По едно продолжение, Далас на домашен терен славеше против Њујорк Никс со 126:121, благодарение на неверојатната партија на словенечкиот кошаркар Лука Дончиќ. Во последните 33 секунди од регуларниот дел од натпреварот Њујорк влезе со девет поени разлика (112:103), за домашните во возбудлива завршница да стигнат до продолжение.
Дончиќ отиде на линијата за слободни фрлања на 4,2 секунди до крајот, го погоди првиот шут, а потоа намерно го промаши вториот. Словенечкиот играч на секунда пред крајот успеа да дојде до топката и да постигне кош за реми, 115:115.
Во продолжението Дончиќ со седум поени го предводеше својот тим до четвртата последователна победа. Дончиќ за Далас постигна 60 поени имаше и 21 скок и 10 асистенции. Тој стана првиот играч во историјата на НБА кој постигнал трипл-дабл со 60 или повеќе поени, 20 или повеќе скока и 10 или повеќе асистенции. Дончиќ постави и клупски рекорд со 60 поени.
Спенсер Динвиди постигна 25 поени во победничкиот тим, а Кристијан Вуд запиша 19 поени и девет скока. Кај гостите Квентин Грајмс постигна 33 поени, а Џулиус Рендл имаше дабл-дабл со 29 поени и 18 скока.
НБА, резултати
Орландо – ЛА Лејкерс 110:129
Вашингтон – Филаделфија 116:111
Бостон – Хјустон 126:102
Индијана – Атланта 129:114
Торонто – ЛА Клиперс 113:124
Мемфис – Феникс 108:125
Оклахома – Сан Антонио 130:114
Далас – Њујорк 126:121 (прод.)
Голден Стејт – Шарлот 110:105
Сакраменто – Денвер 106:113