Кошаркарите на Голден Стејт се првите патници во големото финале на НБА лигата, откако на домашен терен го победија Далас со 120:110 и со тоа славеа со 4:1 во финалната серија на Западната конференција.
Најефикасен во тимот од Сан Франциско беше Клеј Томпсон со 32 поени (осум тројки), до дабл-дабл учинок дојде Ендрју Вигинс со 18 поени и 10 скока, а Дрејмонд Грин додаде 17 поени.
Стеф Кари беше прогласен за најкорисен играч во финалната серија на Западната конференција, со просек од 23,8 поени, со 7,4 асистенции и 6,6 скока.
Во тимот на Далас најдобар учинок имаше Лука Дончиќ со 28 поени, девет скока и шест асистенции, Спенсер Динвиди додаде 26 поени, додека Доријан Фини-Смит постигна 13 поени.
Голден Стејт во текот на целиот натпревар беше во водство, а најголемите плус 25 (87:62) ги имаа во третата делница. За „Вориорс“ ова е шесто НБА финале во осум сезони. На тој начин го израмнија рекордот на Чикаго Булс, кои предводени од Мајкл Џордан тоа го направија во периодот од 1991 до 1993 и 1996 до 1998 година.