Голден Стејт и Хјустон дојдоа на само една победа до пласман во конференциските финалиња во НБА плеј-офот. Голден Стејт со победа на гости кај Њу Орлеанс од 118:92 дојде до предност од 3-1 во меѓусебни пресметки со Пеликанс и веќе на следниот меч во Оукланд може да ја заврши неизвесноста околу местото во финалето на Западот.
За разлика од претходниот дуел кој беше целосно под доминација на Пеликанс, сега момците од Калифорнија беа оние кои не оставија простор за противникот. Ентони Дејвис го заврши мечот со 26 поени, додека кај Голден Стејт доминираше двоецот Дјурант-Кари. Дјурант реализираше 38, додека Кари заврши со 23 поени.
Хјустон пак се прошета на гостувањето во Солт Лејк Сити и оствари трета победа над „џезерите“, овој пат со 100:87. Одличниот двоец Пол-Харден беше предводник на Рокетс до третата победа во серијата. Крис Пол средбата ја заврши со 27 поени, додека Харден додаде 24.