Кошаркарите на Хјустон поведоа со 3-2 во финалната серија на Западот, откако синоќа во петтиот меч го совладаа актуелниот шампион Голден Стејт со 98:94. Со тоа момците на Мајк Д’Антони се на чекор до пласман во големото финале.
Целиот меч мина во неизвесност, па на полувреме се замина со егал ситуација – 45:45. Во вториот дел за нијанса домашните беа подобри, иако двата тима постојано се менуваа во водство. Во финалната четвртина Хјустон го имаше „меч винерот“ наречен Ерик Гордон, кој покрај Харден и Пол го донесе својот тим до позиција за победа. Голден Стејт имаше шанса за победа, ако успееше да реализира на 7 секунди до крајот за израмнување, но ја загубија, па Гордон ги постигна решавачките два поени за победа.
Мал хендикеп за Хјустон е повредата на Крис Пол, кој имаше лош доскок и повреда на задната ложа, но последните вести велат дека тој ќе може брзо да се врати на паркетот. Инаку, најефикасни кај Рокетс синоќа беа Гордон со 24 поени и Пол кој уфрли 20, додека кај екипата на Голден Стејт прв поентер беше Дурант со 29 поени.