Ракометарите на Охрид втора сезона по ред обезбедија пласман во осминафиналето на Европскиот куп на ЕХФ, откако успешно ја минаа третата пречка и го елиминираа литванскиот Драгунас Клаипеда.
Актуелниот освојувач на трофејот уште еднаш покажа зошто е меѓу сериозните кандидати за висок пласман, совладувајќи го противникот во двата натпревари од двомечот.
„Гладијаторите“ практично ја завршија работата уште на првиот дуел, на кој славеа убедлива победа од 30:19, а во реваншот пред своите навивачи во СРЦ „Билјанини Извори“ само ја потврдија супериорноста со нов триумф од 32:25 (15-11).
Најефикасен во победничкиот состав беше Ѓукиќ со седум погодоци. Иванковиќ, Лијапис и Зечевиќ постигнаа по четири гола, додека кај гостинскиот тим Драксас се истакна со четири погодоци.
Со убедливиот вкупен триумф, Охрид продолжува во осминафиналето и останува во игра за одбрана на европската круна освоена минатата сезона.
Охриѓани сега со нетрпение ја очекуваат ждрепката за следната фаза, во која ќе се обидат да направат уште еден чекор кон нов европски успех.

