Спортистите кои освоија медал на последните Олимписки игри во Париз добија ветување дека во било кое време може да побараат замена на истите, доколку детектираат некое нивно оштетување.
Според официјалните информации од организаторите, досега стигнале 220 барања за замена на медалите, на чија површина е забележано оштетување кое не е предизвикано од нивните сопственици.
Медалите беа изработени до познат француски бренд за луксузен накит, а во нив е вметнат и мал дел железо од Ајфеловата кула, кој е обезбеден при последната реставрација направена минатиот век.
Неколку спортисти објавија фотографии и видеа од медалите, жалејќи се на слабиот квалитет на нивната изработка, а организаторите велат дека 220-те барања за замена се еквивалент на 4 проценти од доделените медали на ЛОИ во Париз.
Изработката на нови медали оди според редоследот на добиените барања, па спортистите во одреден рок ќе си ја добијат бараната замена.

