25-то издание на Зимските олимписки игри ќе започне со церемонија на стадионот Сан Сиро во Милано. Освен во Милано на овие ЗОИ натпревари ќе бидат организирани и во Кортина д’Ампецо. На Игрите ќе учествуваат 2.871 спортист од 93 земји, а Македонија ќе ја претставуваат четворица спортисти, по двајца во натпреварите во алпско и нордиско скијање.
Олимписките игри Милано-Кортина 2026 ќе бидат првите во историјата чијшто официјален домаќин ќе бидат два града. Милано првенствено ќе биде домаќин на спортовите во затворен простор и на мраз, додека другите натпревари ќе се одржат во спортските кластери околу Кортина, како и во долините Валтелина и Фиеме.
Ова ќе бидат третите Зимски олимписки игри и четвртите Олимписки игри вкупно што ќе се одржат во Италија, додека Кортина д’Ампецо веќе беше домаќин на Зимските олимписки игри во 1956 година.
Церемонијата на отворањето на Зимските олимписки игри ќе се одржи на стадионот Сан Сиро во Милано, под насловот „Хармонија“. За време на церемонијата се планирани и специјални музички изведби на американската пејачка Мараја Кери, како и на италијанските уметници Лаура Паусини и Андреа Бочели.

