Менаџерот на Ливерпул, Арне Слот ги пофали своите играчи по натпреварот против Њукасл. „Црвените“ победија со 2:0 и направија голем чекор кон титулата во Премиер лигата. „Важно е што победивме. Против Сити беше потешко, но, тоа е поинаков натпревар“ – рече Слот. „Сега по ваква победа играчите заслужуваат комплименти“ – изјави тренерот на „црвените“ кои имаат голема предност во однос на Арсенал во трката за титулата.
Author: dino
Фудбалерот на Реал Мадрид, Винисиус Жуниор, по вчерашната победа кај Реал Сосиедад во рамките на Купот на Шпанија, ги откри неговите желби. Тој категорично ги негира најавите дека може да замине во Саудиска Арабија иако се споменуваше и трансфер во висина од 300-та милиони евра. „Да се биде толку млад и да се игра толку многу натпревари е нешто што никогаш не го замислував или сонував. Се надевам дека ќе испишам историја во овој клуб“ – изјави играчот на Реал Мадрид.
Фудбалерот на Порто, Пепе, има скинати мускулни влакна на десната бутина и ќе ги пропушти следните натпревари. Неговото враќање на теренот се очекува за еден месец. Бразилскиот интернационалец вчера бил на лекарски прегледи откако принудно го напушти мечот со Виторија Гимараеш. Бекот ќе ги пропушти мечевите против Арука, Брага и Авеш. Луѓето од Порто се надеваат дека Пепе ќе биде подготвен за настап на дербито со Бенфика закажано за првата недела во април.
Менаџерот на фудбалерите на Манчестер Сити, Хосеп Гвардиола беше задоволен по победата од 1-0 на гости кај Тотенхем во дербито на Премиер-лигата. „Среќен сум со победата, ни требаа три бода. Во првото полувреме создадовме многу шанси, но, не ги искористивме. Тоа беше причината поради која настрадавме во вториот дел“ – рече Гвардиола. „Момците се бореа, но, секогаш е тешко да се игра тука. За среќа се заврши добро“ – изјави тренерот на „граѓаните“.
Романскиот ракометен состав, Баја Маре, ќе му биде противник на нашиот Алкалоид во новата елиминациска рунда во ЕХФ Европскиот куп. Избраниците на Кире Лазаров првиот меч треба да го одиграат на теренот на противникот додека реваншот ќе биде во Скопје. Баја Маре претходно ги елиминираше косовскиот Раховеци и финскиот БК-46. Алкалоид пак успеа да ги прескокне претставниците на Австрија и Италија.
Весникот –„Кориере Дела Сера“, тврди, дека тренерот на фудбалерите на Милан, Серхио Консеисао, има посебна клаузула која му дозволува на клубот да го ослободи без отштета доколку не успее да се квалификува во Лигата на шампионите. Тој заработува 1 милион евра по сезона а договорот со „росонерите“ му е валиден до летото во 2026 година. Милан засега е на седмото место на табелата во Серија „А“ и доколку не оди во ЛШ, тогаш Консеисао сигурно ќе добие отказ.
Фудбалерите на Рома ја продолжија фантастичната серија откако доцна синоќа ја совладаа Монца со 4-0 во меч од Серија „А“. Тренерот, Клаудио Раниери, не крие дека е задоволен. „Атмосферата во соблекувалната е одлична. Ние работиме добро а секој натпревар е различна приказна. Сега размислувам за Комо“ – изјави тренерот на „волчицата“. Рома од почетокот на годинава има шест победи и два нерешени меча со гол-разлика 16:5.
Поранешниот фудбалер и тренер на Тотенхем, Глен Ходл, кој работи како аналитичар за ТНТ Спортс, вели дека ја разбира фрустрацијата на навивачите на „спарси“ поради лошата политика на претседателот, Даниел Леви. Англискиот состав има катастрофална сезона и се наоѓа на 12-то место во Премиер лигата. Згора на тоа испадна и од двете значајни Куп натпреварувања на oстровот. Затоа легендата на англискиот клуб го повика претседателот да внесе повеќе пари во тимот за да ја врати „славата“ на клубот.
Седум играчи на Манчестер Сити ќе мораат да побараат нова средина откако менаџерот, Пеп Гвардиола, најави голем ремонт во текот на летото. „Граѓаните“ имаат лоша сезона откако беа елиминирани од Лигата на шампионите и заостануваат премногу во трката за титулата во Премиер-лигата. Според информациите на „Скај Спортс“, англискиот клуб ги информирал Едерсон, Џон Стонс, Матео Ковачиќ, Илкај Гундоган, Бернардо Силва, Џек Грилиш и Кевин Де Бруин, дека ќе бидат ставени на трансфер-листата.
Екипата на Жалгирис се обидува да пронајде замена за кошаркарот, Луни Вокер, кој изненадувачки замина во НБА лигата во составот на Филаделфија. Литванскиот клуб се обидува да обезбеди ново име пред мечот со Црвена Ѕвезда во Евро-лигата закажан за в четврток. Според одредени наводи, составот од Каунас преговара со Ајзеа Вонг, кој игра за Шарлот. Тој во сезонава одигра 20 натпревари со просек од 6 поени и 1,4 асистенции.
