Алармот се вклучува во Лацио. Против Јувентус в сабота во 18:00 часот на Стадионот Олимпико, тренерот, Марко Барони, ќе мора да се справи со многу повредени и болни на стоперските позиции Единствениот што е достапен во моментов е Лука Пелегрини. Црногорецот, Адам Марушиќ, е под знак прашалник иако лекарскиот тим ќе се обиде да го опорави за да ја покрие дупката во одбраната. „Римските орли“ во финишот на сезоната во Серија „А“ се борат за место во Лигата на шампионите.
Author: dino
Фудбалерот на Барселона, Рафиња, го израмни рекордот на Кристијано Роналдо, по бројот на голови и асистенции во една сезона во Лигата на шампионите. Бразилецот на вчерашниот меч кај Интер во реваншот од полуфиналето постигна погодок за предност од 3-2 но, неговиот тим го загуби мечот по две продолженија со 4:3 и не влезе во големото финале. Рафиња во сезонава постигна 13 гола и запиша 8 асистенции. Достигнувањето на Кристијано Роналдо датира од сезоната 2013/2014, кога играше за Реал Мадрид.
Голманот на Интер, Јан Зомер, не крие дека е многу среќен што неговиот тим влезе во големото финале во Лигата на шампионите. „Многу сум среќен, одигравме неверојатен натпревар. Која одбрана ќе ја паметам? Последната против Ламине Јамал. Тој е одличен играч и за среќа не постигна гол“ – рече Зомер. „Навистина сум горд на нашиот тим и на тоа како игравме. Немате многу шанси да стигнете до финале во Лигата на шампионите. Дадовме сè на теренот“, додаде Зомер.
Дукати во текот на викендот ќе има шанса да испише историја на трката во Мото ГП за Големата награда на Франција доколку еден од шесте возачи што ги користат моторите на Италијанците победи во Ле Ман. Тоа би било 23-та последователна победа на Дукати во премиер класата, што ќе биде нов рекорд. Моменталниот од 22 последователни победи го постави Хонда гледано од трката за Големата награда на Малезија во 1997 година до трката за Големата награда на Холандија во 1998 година.
Тренерот на фудбалерите на Интер, Симоне Инзаги, по вчерашната елиминација на Барселона, вели дека неговиот состав заслужено влегол во финалето на Лигата на шампионите. „Мораме да и честитаме и на Барселона, бидејќи е навистина силен противник. Потребен беше супер Интер, па им честитам на моите момци за двата неверојатни натпревари. Тоа е единствениот начин да се стигне до финалето“ – рече Инзаги. „Горд сум што сум нивни тренер бидејќи дадоа сè од себе. Никогаш не бевме арогантни, заслуживме да стигнеме до финалето“ – рече тренерот на италијанскиот тим
Тренерот на кошаркарите на Голден Стејт, Стив Кер, потврди дека Стеф Кари има истегнување на тетивата. „Неговата состојба ќе се проценува секојдневно. Ќе направи магнетна резонанца. Разговарав со него за време на паузата, тој беше, секако, депресивен. Момчињата го презедоа неговиот товар и го добија натпреварот.“ – рече Кер. „Сите сме загрижени за Стеф но, тоа е дел од играта. Момците успеаја одлично да ја завршат работата“, рече главниот тренер на Голден Стејт по победата кај Минесота.
Генералниот менаџер на Феникс, Брајан Грегори, ги изложи очекувањата за следната сезона во НБА лигата. Популарните „сонца“ во сегашниов шампионат не успеаја да стигнат до разигрувањето. „Имаме многу талентиран состав. Имаме доволно талент да зборуваме за солидна основа за понатамошна работа“ – рече Грегори. „Секако, работењето на трансферите ќе биде клучно. Главната задача ќе биде да се утврди кохерентноста и идентитетот на тимот. Ако сè се среди, ќе бидеме многу добри“, рече новиот генерален менаџер на Санс.
Селекторот на одбојкарите, Јошко Миленкоски, подготовките за летните активности ќе ги започне со 16 репрезентативци откако избриша шест од првично објавениот список. Прв предизвик за Македонија во наредниот период ќе биде Златната Европска лига. Подготовките на одбојкарите ќе започнат на 15 мај во Струмица.
Фудбалерите на Рома остварија значајна победа против Фиорентина со 1-0 и го задржаа курсот кон Лигата на шампионите за наредната сезона Тие сега се наоѓаат на делба на четвртото место со Јувентус и Лацио. „Секогаш сакам максимум од моите фудбалери. Мора да бидеме задоволни од постигнатот. Сакам да кажам дека игравме против многу силен тим“ – наглaси тренерот на Римјаните, Клаудио Раниери. „Сакавме да ги притиснеме високо бидејќи добро ја држат топката. Одигравме одличен натпревар“ – потенцираше стратегот на „римската волчица“.
Тренерот на фудбалерите на Јувентус, Игор Тудор, не крие дека е задоволен по ремито со Болоња во рамките на Серија „А“. „Ова е добар бод, солиден резултат на тежок стадион каде што секој има проблеми. Имавме многу повредени и суспендирани играчи но, се снајдовме добро“ – рече Тудор. „Создадовме шанси но, можеме да бидеме задоволни имајќи ги в предвид сите околности“ – рече тренерот на „Старата дама“ од Торино.
